З дзясятак астраўчан, якія, нягледзячы на пандэмію, вырашылі не парушаць традыцыі і прыйшлі пакланіцца тым, хто здабыў нам мірнае неба над галавой, выконваючы рэкамендацыі медыкаў, стаялі паводдаль. Але слёзы, якія блішчалі ў іх вачах гаварылі: мы – тут, мы – разам, мы памятаем і дзякуем. Многія з іх былі з кветкамі і партрэтамі сваіх загінулых у вайну родных…
– Кожны год ля помніка савецкім воінам і партызанам мы збіраемся, каб успомніць герояў Вялікай Айчыннай вайны, і гэты май не стаў выключэннем, – сказаў старшыня райвыканкама Ігар Шалудзін. – 9 Мая не проста дзяржаўнае свята, гэты дзень важны для кожнага беларуса, таму што няма сярод нас сям’і, якой не закранула б вайна… Гэты дзень для нас – сімвал нацыянальнай гордасці і памяці. Ён – у сэрцы кожнага, хто разумее цану міру, хто вышэй за ўсё ставіць гонар і свабоду сваёй Айчыны.
Віншаванні са святам Перамогі і цёплыя пажаданні ветэранам, удзельнікам вайны, якіх з кожным годам застаецца ўсё менш, а таксама ўсім жыхарам Астравеччыны выказала старшыня раённай арганізацыі ГА «Беларускі саюз жанчын» Наталля Баніцэвіч.
…Вялікай была Перамога, але і бязмернай стала яе цана для Беларусі – трэць сваіх сыноў і дачок страціла яна ў гады ваеннага ліхалецця. Мы гэта ведаем, памятаем і шануем!